ప్రకాశం జిల్లా సింగరాయకొండ ప్రభుత్వ ఆసుపత్రిలో గర్భిణీ స్త్రీల ఆరోగ్య పరిరక్షణ లక్ష్యంగా ప్రత్యేక అవగాహన కార్యక్రమం

సింగరాయకొండలోని ఉన్నతశ్రేణి ప్రాథమిక ఆరోగ్య కేంద్రంలో ఎస్ ఎమ్ ఓ కొండపి ఆధ్వర్యంలో పీఎంఎస్‌ఎంఏ కార్యక్రమాన్ని నిర్వహించారు. ఈ కార్యక్రమంలో ప్రభుత్వ ఆసుపత్రి వైద్యులు డాక్టర్ ధీరేందర్ డీడీఓ మరియు డాక్టర్ వంశీధర్ పాల్గొని గర్భిణీ స్త్రీలకు ఆరోగ్య సూచనలు అందించారు.

గర్భం దాల్చిన మొదటి రోజు నుంచి ప్రసవం వరకు తీసుకోవాల్సిన జాగ్రత్తలపై వైద్యులు వివరించారు. ప్రతి నెల 9 మరియు 10 తేదీల్లో గర్భిణీలకు వైద్య పరీక్షలు నిర్వహించి అవసరమైన మందులు అందజేస్తున్నామని తెలిపారు.

గర్భధారణ సమయంలో ఆరోగ్యకరమైన ఆహారం తీసుకోవడం, ఐరన్ మరియు కాల్షియం మాత్రలు క్రమం తప్పకుండా వినియోగించడం, రక్తహీనత నివారణపై ప్రత్యేక శ్రద్ధ అవసరమని వైద్యులు సూచించారు. అలాగే మానసిక ప్రశాంతతతో ఉండడం, అధిక శ్రమ చేయకుండా వైద్యుల సూచనలు తప్పనిసరిగా పాటించాలని తెలియజేశారు.

ప్రతి గర్భిణీ కనీసం నాలుగు సార్లు వైద్య పరీక్షలు చేయించుకోవాలని, బీపీ, షుగర్ వంటి సమస్యలను ముందుగానే గుర్తిస్తే తల్లి-శిశువు ఆరోగ్యాన్ని కాపాడవచ్చని వివరించారు. పాలు, గుడ్లు, ఆకుకూరలు, పండ్లు, పప్పుధాన్యాలు ఎక్కువగా తీసుకోవాలని సూచించారు.

ప్రభుత్వం అందిస్తున్న ఉచిత వైద్య సేవలు, ప్రసవ సేవలు, అంబులెన్స్ సౌకర్యం, ఉచిత మందులు వంటి వసతులను గర్భిణీ స్త్రీలు వినియోగించుకోవాలని వైద్యులు కోరారు.

ఈ కార్యక్రమంలో ఆశా వర్కర్లు, గర్భిణీ స్త్రీలు మరియు ఆసుపత్రి సిబ్బంది పెద్ద సంఖ్యలో పాల్గొన్నారు. గ్రామీణ ప్రాంతాల్లో గర్భిణీలను సమయానికి ఆసుపత్రులకు తీసుకువచ్చి సేవలు అందిస్తున్న ఆశా వర్కర్ల సేవలను వైద్యులు అభినందించారు.

కార్యక్రమం చివరలో గర్భిణీ స్త్రీల సందేహాలకు వైద్యులు సమాధానాలు ఇచ్చి, తల్లి మరియు శిశువు ఆరోగ్యం పట్ల ప్రతి కుటుంబం ప్రత్యేక శ్రద్ధ చూపాలని సూచించారు.